Romans 15

1– 2Kwo yi-i gye ge aɓeye to zhin nyaho nu n Shekwoyi aba kwo yi ya zhin ɓan, yita mi ya gyi abye ya zhin ɓan, ntuge ya da yihin agman, tile ya pa azaje ɓo nɓa shakai n dna, nɓa gye ge aɓeye to bmiya lo nyin. Yi zhin ɓo n kwo ɓa da azaje to ge eyihin, ya zhin ɓo n kwo ɓa bma wo zhin kwa miwo gni dna n Dagayi. 3Kristi to zhin ɓo n kwo dawo num, She, zabura ka yi wa da “Waɓe n tuge, wa sin wahala, n na za kun nɓa wun Dagayi nu nyi.” 4Aɓeye n na cei kafi n litafi tunyi n sapa nyi, a kafi ntuge ɓa wuyi-atnazhin n bugba kala bwayi nu. Nnabayi ya pmi peceiye n hakuri yi har ewyi n Shekwoyi ɓe zun laifi kni n efiyi.

5Shekwoyi n wo ga hakuri, n migniyi, n bugba kala yi, wo bma fye zhin fya sase n na jeyi n bugba dayi za-zai wuwo do Kristi hali. 6Nsayi, eyi vinya yami ci Dagayi n begye yi gmanyi, yi ga Shekwoyi mwa-mwa, eyi Dagayi Yesu Kristi Dada.

Abyedo Ɓa Dagma

7Ntu lonu fye ye, n na jeyi n ikklisiya, shi Kristi wa gwo fye n bugba bui-bui n na bai n Shekwoyi eye ɓa latu. 8Fye pa ge, Yesu Kristi wa ɓe wa wu ge Shekwoyi ta daɓo wa pman, njesun wa bma a Yahudiyi zhin. 9Njesun fye pa ge waɓe n na bai abyedo ɓa bwa gnigni, ɓa ga Shekwoyi mwa-mwa ntu wo sun-sun gye ɓo. Nyanu n Zabura kayi wa da, sanu n wo ɓei ka n cei ge, “Mba ciho dna n abyedo, ma la oho ye tu.”

10Nna abado, “Fye dagma, ofye abyedo ngnisun nwo azayi a Yahudiyi.” 11Njesun, “Fye ci Dagayi, ofye abyedo, fa aza vinya ɓa ciwo.” 12Anabi Ishaya wa cige “Gado gyiyi ɓa gmi n Jese puwa, wa gyi be tu n abyedo tukwo, ɓa ɓei tu awye n wo nu vinya.”

13Nlonu mi zhin aduwa ga fye abyedo, n na bai Shekwoyi n wo gafye awye tunyi, wa ga fye a gmada n bugbafu yi, shi fya gawo gaiciya. Mi zhin aduwa n Shekwoyi ɓa nu fye n awyetu yi dna n Zafun Gyi-gyi-yi iko n wo dna n fye nyi.

14Mi kpe lo fye zhin aza manayi nu n ceceyi, omi azaje, fye kpe aɓeye ye lo n fye ɓami fya wu azaje ɓa. 15– 16Ama mi n bugba kalayi lo ma je fye aɓeye gna, mi kpe lo fye ye ma pa fye ɓanu kawai, ntuge n Shekwoyi alheri yi, mi zhin tnutnuyi nu n Yesu Krisiti wa tnu fye n cei abyedo. Mi ɓefye n Nabari manayi mi-i ga fye ngye hadaya n Shekwoyi akun, ntuge ala fye zhanya, fyei zhin ɓo wo ye dna n Zafun Gyi-gyi-yi. 17Ntu lonu mi gye kwo bmiya lo ma gma, ntu anya ɓo vinya n Kristi Yesu ku zhin dna n mi nyi. 18Mi ta ye ma daɓo shi wa zhin tnu-tnu n na azajeyi nun, ama n nya yi n mi kpelo, woku a pma zhin n miyi woi wan abyedo ɓe Shekwoyi n cei. 19Ma wan ɓa n waʼazi yi nu, n mi zhin njesun n mi asese manayi nɓa abye, n na aɓo a wowoyi n wa zhin n mi abwai atuze n Shekwoyi aba, vinya n Zafun Gyi-gyi-yi iko yi nu. Dna n Zokwo ye, miku waʼazi zhin nabari manayi Krisiti nya tunyi Urushelima har Ilirukum.

20Ama omi ɓeye nu, miye lo abye mi zhin waʼazi aba n Kristi ye to si kpan, afa aba zado la ikklisiya shi. 21Mi vi shiri nu, nna cei kafi n litafi, aba n Ishaya cige, “Aza n ɓa to shin Kristi ye won ɓaɓa gye ɓa bwa awye ga.” 22Behin-hin enyanu n kwo zhin mi n cei pma ma ɓe fya ba. 23Ama n na avun omi tnu-tnu ku zo n ya mi n shiri yi zhin lo ma ɓe n na aye awyekwo nya ye avun. 24Gama mi zhin shiri lo malo Asbaniya n ma lo mi ɓei bma n Roma, bayan yiku esa manayi bwa n na jeyi fye ɓei gnami ami.

Bma a Yesu-viyi Asangyi-yi Zhin

25Ama kafin mi ɓe tilas malo Urushelima malo a Yesuviyi n cau-tai n ɓo. 26Gama fye gye, a Yesuviyi n ɓa fi n Makidoniya n Akaya yi ɓaku enya ga ntu n na azaje ɓo n ɓa fi n Urushelima ɓai sin wahala nyi. 27Ɓa ɓei zhin kwo n bugba bui-bui ntuge ɓa gyelo ɓa ntayi shi a Yesuviyi lo nɓafi n Urushelima. Ntu n kni ɓei ya? Ntuge nabari manayi Kristi nya kun n Urushelima nu kwoi lo abyedo aba. Tunda ɓa ɓei gwo cauta Zafun nya nabari manayi nya nɓenu ɓa gye ɓe n ɓa ɓa zhin ɓa, okwo nu ɓa gaɓa akaya nanyi nya. 28Sanu n ma gaɓa agyiwye ye, ma zo n ɓatnu-tnu manayi yei, mi ɓei ɓe ma gye fye wye mi-i lo Asbaniya lo. 29Mi kpe lo sanu n mabe, Dagayi ɓei gami anabarka ntu n fye ɓo, ma ɓefye n cei.

30Fye ɓa zhin aduwa ngnisun n miyi? Ntu n Dagayi Yesu Kristi ɓo, ntu nfye yeye ɓo nfye yemi nyi, n Zafun Gyi-gyi-yi ga fye-fye zhin aduwa n mwa n gnisun n miyi ntu mi tnu-tnu ɓo. 31Fye zhin aduwa n nyaho ta bwami n na aza kun n ɓa ta vi Yesu Kristi nyin, n ɓa fi n Urushelima nyi. Fye zhin aduwa njesun n na Yesu viyi ɓei gwo agyiwye n mi lo ɓa n cei nyi. 32Nnavun nmi ɓa mi ma ɓe of ye aba n bugba bui-bui dna n Shekwoyi ɓeye, yi ɓa gaje kala.

33Nsayi ye, Shekwoyi n wo ga bugba fu nyi, wo kun sun n fyei.